Psa 79 | YomNWM | STEP | Nkunga Asafi. A Nzambi ! Makanda mabulumukini kuika kiaku, Masumuna nzoꞌaku yinlongo, makitula Yelusalemi kunza ki matadi.

Psalms 79

Yelusalemi ditiolumukini

Nkunga Asafi.

1 A Nzambi ! Makanda mabulumukini kuika kiaku,
Masumuna nzoꞌaku yinlongo,
makitula Yelusalemi kunza ki matadi.
2 Bavana zinitu zifua zi bisadi biaku
banga bidia kuidi zinuni zi diyilu
minsuni mi banlongo baku
kuidi bibulu bi ntoto ;
3 Batengudi menga banga nlangu
mu yendila Yelusalemi ayi kusia monika ko
mutu mu zika.
4 Tuyikidi bila ki lusembo kuidi bafikimini yeto ;
mvuezolo ayi kisekonono
kuidi bobo batuzungididi.
5 Nate thangu mbi, a Yave ? Wela fueminanga mu zithangu zioso e ?
Nate thangu mbi kiphala kiaku kiela
leminanga banga mbazu e ?
6 Dukula miangu miaku kuidi makanda momo masia kuzaba ko,
kuidi bipfumu biobi kabi telanga ko dizina diaku.
7 Bila bameni dia Yakobi,
ayi bamana tiolumuna tsi andi yikabutukila.
8 Kadi kututangila masumu ma bakulu !
Bika kiadi kiaku kiza nsualu kuidi beto
bila tueka mu mabienga makambulu diana.
9 Wutusadila, a Nzambi Mvulusi eto
mu diambu di nkembo wu dizina diaku !
Wutukuidi ayi wutulemvukila masumu meto
mu diambu di dizina diaku !
10 Bila mbi makanda meti tubila :
“Kuevi kuidi Nzambi e ?”
va ntuala meso meto, zabikisa va khatitsika makanda
ti ngeyo weti vutula landi mu menga matenguka ma bisadi biaku,
11 Bika kunga ku batu badi mu nloko kutula va ntualꞌaku.
Mu zingolo zi koko kuaku,
tanina bobo bazengolo nkanu wu lufua.
12 Vutudila mu zikhumbu tsambuadi bifingu bi bobo batufikimini ;
tsembolo yoyi bawobudila ngeyo Yave.
13 Buna beto batu baku, nkangu aku wu mamemi weti dikila ;
tuela kuzitisa mu zithangu zioso ;
mu tsungi ka tsungi, tuela yolukila minzitusu miaku.